Зголемени тензии меѓу Кина и Германија поради електричните возила

Германската министерка за надворешни работи Аналена Баербок рече дека Европската Унија треба да биде помалку зависна од Кина и дека ја поддржува истрагата на ЕУ за субвенциите што Пекинг ги издвојува за својата индустрија за електрични возила.

„Ако сте премногу тесно врзани, тоа може да ве доведе до ризик“, рече Баербок во неделното интервју за „Блумберг“. Таа додаде дека е неопходно „да се намали зависноста“ од земји како Русија, која ја нападна Украина, „но сега со осврт и кон Кина“.

Европската комисија, извршното тело на ЕУ, минатата недела најави истрага против субвенциите, што може да доведе не само до царини за увоз на електрични возила произведени во Кина туку и до одмазда од страна на Пекинг. Тоа би било опасна ескалација за ЕУ, чиј автомобилски сектор директно или индиректно поддржува речиси 14 милиони работни места, или 6,1 отсто од работната сила на блокот.

Тензиите меѓу Кина и ЕУ тлеат со месеци. Преминот кон почисти технологии е посебна точка на спор, при што индустриското јадро на Унијата е изложено на ризик да го загуби уделот поради кинеските компании.

Аналена Баербок Bloomberg

Во понеделникот, портпаролката на кинеското министерство за надворешни работи Мао Нинг ја критикуваше Баербок за коментарите што ги даде минатата недела во интервју за „Фокс њуз“, во кое таа го нарече кинескиот претседател Шји Џјинпинг диктатор.

Според транскриптот од интервјуто, Баербок го повторува ветувањето дека Германија ќе ја поддржи Украина „колку што е потребно“, пред да додаде: „Бидејќи, ако Путин победи во оваа војна, каков знак ќе биде тоа за другите диктатори во светот, на пример за Шји, кинескиот претседател?“

Мао ги нарече забелешките „бесмислени и крајно неодговорни“ и нагласи дека Кина го изразила своето „незадоволство преку дипломатски канали“.

„Тие се во спротивност со основните факти и претставуваат сериозно прекршување на дипломатскиот протокол, сериозна навреда на политичкото достоинство на Кина и бесрамна политичка провокација“, рече Мао.

Германија би била особено тешко погодена доколку трговската одмазда за субвенциите за електрични возила се претвори во целосна трговска војна. Германските производители на автомобили „Фолксваген“ (Volkswagen AG), „Мерцедес-бенц“ (Mercedes-Benz AG) и БМВ (Bayerische Motoren Werke AG) имаат изградено десетици фабрики во Кина, а сите три сега продаваат повеќе возила во азиската земја отколку на кој било друг пазар.

Истрагата за електричните возила, која е од стратегиско значење за Европа, ќе биде разгледана со кинеските претставници за време на посетата на Кина следната недела, изјави во саботата шефот за трговија на ЕУ, Валдис Домбровскис.

Баербок рече дека Европа треба да се обиде да го намали ризикот со дистанцирање од Кина, но не и да ги прекине врските, „бидејќи не можете да се разделите во меѓусебно поврзан свет“.

Истрагата на ЕУ го означува првиот конкретен чекор во борбата против кинеската државна поддршка за зелени технологии по повеќе од една година зголемување на субвенциите во САД, Кина, Велика Британија и Европа. Во зависност од резултатите, тоа може да ги придвижи земјите кон протекционистички мерки.

„Да бидеме партнер во климатските прашања, да бидеме конкурент на Кина кога станува збор за новите технологии, но и да видиме дека сме систематски ривали и дека мораме да ја заштитиме нашата сопствена ранливост“, рече таа. „Треба да можеме да се браниме, а не да бидеме наивни“.

Во моментов нема коментари за веста. Биди прв да коментира...

Остави коментар