„ЗК Пелагонија“: Нереално ниски се откупните цени за пченицата

Во услови кога сточното брашно има цена од 12 денари за килограм, несфатлива и нереална е најавата од млиновите во Македонија дека пченицата од годинешната реколта ќе ја откупуваат по цена од 9, 10 и 11 денари. Ваквата цена е нереално ниска и ќе доведе до колапс на домашниот сектор за производство на жито, соопшти „ЗК Пелагонија“.

Според нив, ваквата откупна цена ќе доведе до загуба на производителите на пченица, а загубата кај примарното производство значи загуба и во следната година. Тие велат дека земјоделците нема да имаат средства за набавка на потребните репроматеријали за финансирање на следна реколта, што значително ќе се одрази и на квантитетот и квалитетот на идното производство.

„Имено, ако се знае дека при преработка на 1.000 тони пченица, се добиваат 300 тони сточно брачно, 330 тони брашно ТИП 500 и 370 тони брашно ТИП 400 и ако на тоа се додадат трошоците за преработка на пченица и тоа за електрична енергија, амбалажа, работна рака, како и остварување на добивка, пресметките покажуваат дека откупната цена пченицата треба да изнесува 14,42 ден./кг“, сметаат од комбинатот.

Оттаму додаваат дека откупната цена на пченицата на светската берза МАТИФ изнесува 232,75 евра за тон, а во Србија изнесува 195 евра за тон.

„Ако на тоа се додаде плус од 35 до 40 евра за превоз, цената со испорака во Македонија чини најмалку 230 евра за тон, односно 14,20 ден./кг што значи дека и набавката на пченица од Србија во моментов изнесува многу повеќе од бараните цени на млиновите во Македонија“, велат од комбинатот.

Од комбинатот укажуваат дека здружувањето на млинарите со цврст став да ја откупуваат пченицата по ниски цени, нема никаква реална основа земајќи ги во предвид сите пазарни услови и воопшто нема никаков фер однос кон производителите на пченица.

„Доколку се дозволат бараните нереално прениски цени од млинарите, тоа ќе доведе до загуба на производителите и прашање е само колку истата ќе изнесува, односно дали доколку се обезбеди одредена финансиска помош од страна на државата, ќе се успее да се дојде до позитивна нула“, велат од кобминатот.

 

 

Во моментов нема коментари за веста. Биди прв да коментира...

Остави коментар