Таткото на вештачката интелигенција меѓу добитниците на Нобеловата награда

Еден од највлијателните академици во областа на вештачката интелигенција, Џефри Е. Хинтон, е награден со Нобеловата награда за физика за неговата работа на обука на вештачки невронски мрежи и поставување на темелите за денешните апликации за машинско учење.

Хинтон ќе ја подели наградата од 11 милиони круни (1,1 милион долари) со својот колега научник Џон Џ. Хопфилд, соопшти Кралската шведска академија на науките во Стокхолм во вторникот.

Нивната работа започна во 1980-тите години, поставувајќи ја основата за сегашниот бум на вештачката интелигенција, овозможен од експлозијата на компјутерската моќ и огромните количества на податоци за обука. Сепак, Хинтон во последниве години предупредува за опасноста од премногу моќна вештачка интелигенција.

Хопфилд создаде асоцијативна меморија што може да складира и реконструира слики и други типови на шаблони во податоците, соопшти Кралската шведска академија на науките. Хинтон е познат во круговите на вештачката интелигенција како еден од татковците на технологијата, главно поради неговото рано истражување на невронските мрежи - вид на софтвер за машинско учење што грубо го имитира начинот на кој функционира човечкиот мозок.

Во 1983 година тој ги кокреира Болцмановите машини, еден од првите типови  невронски мрежи што користат статистички веројатности, и подоцна беше коавтор на значаен труд што покажа дека техника за ажурирање на јачината на врските во невронската мрежа може да му даде на овој софтвер извонредни способности за учење.

„Изненаден сум, немав поим дека ќе се случи ова. Многу сум изненаден“, изјави Хинтон (76) за новинарите собрани во Стокхолм преку телефон.

Хинтон предупредува за ризиците од вештачката интелигенција, додека ги истакнува нејзините придобивки. Тој ја напушти својата позиција во тимот за истражување на вештачката интелигенција на „Гугл“ (Google) минатата година за да може слободно да зборува за ризиците поврзани со брзиот развој на вештачката интелигенција.

Тој исто така поддржа закон што неодамна доживеа вето од гувернерот на Калифорнија, Гавин Њусом, кој би ги сметал развивачите на вештачка интелигенција одговорни за секоја сериозна штета предизвикана од нивните технологии.

Запрашан во вторникот за какви било жалења во врска со неговата работа, Хинтон рече: „Во исти околности повторно би го направил истото, но загрижен сум дека целокупната последица од ова може да бидат системи поинтелигентни од нас, кои на крајот ќе ја преземат контролата“.

Невронските мрежи што го имитираат мозокот во обработката на податоци ќе бидат „прекрасни во многу аспекти во области како здравството“, рече тој, но предупреди дека има „неколку можни лоши последици, особено заканата од работи што би излегле од контрола“.

Хинтон, кој е роден во Лондон, е поврзан со Универзитетот во Торонто, Канада, додека Хопфилд (91), кој е роден во Чикаго, е поврзан со универзитетот „Принстон“.

Меѓу најпознатите лауреати на Нобеловата награда за физика се Алберт Ајнштајн во 1921 година за заслуги во теоретската физика и Марија Кири, заедно со нејзиниот сопруг Пјер, за истражувањето на радијацијата во 1903 година.

Годишните награди за достигнувања во физика, хемија, медицина, литература и мир беа воспоставени со тестаментот на Алфред Нобел, шведскиот изумител на динамитот, кој почина во 1896 година. Наградата за економски науки беше додадена од централната банка на Шведска во 1968 година.

Лауреатите се објавуваат до 14 октомври во Стокхолм, со исклучок на наградата за мир, чии добитници ги избира Норвешкиот Нобелов комитет во Осло.

Во моментов нема коментари за веста. Биди прв да коментира...

Остави коментар