Убија дете. Го грабнаа наутро, во најпрометниот дел од денот, во центарот на центарот на Скопје, на Илинденска, во деновите кога имаше ограничено движење и беше најобезбедувана улица во историјата на земјава, оти тука поминуваа Блинкен, Лавров и другите присутни на советот на ОБСЕ. Им помагало лицето Александар, чие име стои меѓу името и презимето на Вања во училишниот дневник. Вања, сонце, прости ни. Ние не знаеме што правиме. Да знаевме, различни палчовци одамна ќе беа таму каде што им е местото, а децата како тебе и дедовците како Панче ќе имаа побезбедни улици. И немаше да ги цитираме „Цветови“ и „И бол и бес“ на големиот Славко Јаневски, туку „Шеќерната приказна“.
Во понеделникот наутро, кога министерот за внатрешни работи и јавниот обвинител се обидоа да ја санираат штетата од соопштението што го испратија претходната вечер, лидерите се собраа на лидерска средба. Важно беше во тие моменти на национален шок и тага да се утврди тоа што веќе сите го знаевме – избори ќе има на 8 мај.
Освен лидерите, и дел од пратениците не стигнаа докрај да го изгледаат пресот во понеделникот, затоа што во Собранието почна дебатата за буџетот за идната година. Исто така исклучително важно прашање, кое мораше да се решава баш тој ден. Како да не знаеме што има во предизборни буџети – пари за поголеми плати на администрацијата, за пензии, за антикризни мерки и за понекој проект препишан од претходните десетина буџети ама уште незавршен и нови долгови за затнување на дупката.
Новите долгови ќе бидат со повисоки камати. Иако инфлацијата забавува, Европската централна банка сè уште мери дали треба да му стави крај на монетарното затегнување. Облозите одат во правец на тоа дека по завршувањето на првиот квартал може да се очекува прво намалување на каматите. Во земјава, според нашите аналитичари, олабавувањето ќе дојде подоцна, во втората половина од годината.
Клучниот настан на глобално ниво е климатскиот самит во Дубаи. Македонската делегација таму го презентираше планот според кој на земјава ѝ требаат најмалку три милијарди евра за праведна енергетска транзиција. Целта на транзицијата е намалување на емисиите на стакленички гасови.
Власта има план, ама нема регулатива за многу прашања што можат да го забрзаат исполнувањето на климатските цели. Засега, приватниот сектор сам се бори и на издигнување на свеста, но презема и конкретни чекори во правец на заштита на животната средина.
Од настаните од неделава го издвојувам и ставањето на поранешниот вицепремиер и бизнисмен Кочо Анѓушев на црната листа на САД. Анѓушев ќе се жали кај американските власти за одлуката, амбасадорката на САД, пак, најавува дека бројот на имињата на листата ќе се зголемува.
.webp){kind=icon}
