Откритието дека затвореници осудени на тешки затворски казни ископале тунел долг 40 метри за да избегаат од затворот Идризово предизвика големо внимание кај македонската јавност во текот на изминатава недела, која освен со вести како од филмските сценарија беше исполнета со новини во финансискиот свет што ќе донесат промени во секојдневието.
Имено, продолжи затегнувањето на монетарната политика во обидот да се заузди високата инфлација во земјава и во светот. Народната банка одлучи да ја зголеми каматната стапка на благајничките записи за 0,25 процентни поени, до нивото од 5,5 проценти. Федералните резерви (ФЕД) ги зголемија каматните стапки за 25 базични поени, а претседателката на ЕЦБ, Кристин Лагард, повтори дека ако базичната инфлација се задржи, тогаш ЕЦБ ќе има многу повеќе за покривање со монетарната политика.
Се чини дека разгорувањето на борбата против инфлацијата е оправдано ако се земе предвид дека граѓаните сè потешко врзуваат крај со крај. Тоа најдобро го илустрираат сознанијата дека секоја трета сметка за струја во земјава е со истечен рок за плаќање и дека третина од граѓаните зеле кредит во последните шест месеци за да се справат со високите цени.
Случајот „Кредит Суис“ не престана да ги тресе финансиските пазари ниту откако УБС ја презеде швајцарската банка. Објавивме кои се најголемите губитници и добитници од пропаѓањето на „Кредит Суис“. Проверивме колку македонски банки и други субјекти се изложени кон швајцарската банка и дознавме дека банки од регионот Адрија држат сто милиони евра во „Кредит Суис“. Пишувавме и дека вработените од „Кредит Суис“ ги преплавиле регрутерите на работници насекаде во светот со барања за нова работа.
Анализиравме зошто Македонија нема национален авиопревозник и дали постои можност да се зголеми бројот на авионски врски преку формирање регионален авиопревозник. Во тој контекст прашавме дали постои интерес за воведување лет меѓу Скопје и Љубљана, со оглед на тоа што Македонија и Словенија се во фаза на доделување субвенции за нови авиоврски.
Проблемите на пазарот на трудот не престануваат да ги мачат работодавците. Тие деновиве побараа да се зголемат квотите за увоз на работна сила. Нивното барање има логика ако се земе предвид нашето истражување, кое покажа дека годинава ќе има драстично зголемување на бројот на македонски граѓани што одат на сезонска работа во странство.
.webp){kind=icon}
