Кина ќе ги даночи ултрабогатите за добивките остварени во странство

Кина почна да спроведува долго занемаруван данок на добивки од странски инвестиции од страна на ултрабогатите во земјата, според луѓе запознаени со ова прашање.

На некои богати поединци во поголемите кинески градови во последниве месеци им било кажано да извршат самопроцена или биле повикани од даночните власти на состаноци за да се проценат потенцијалните плаќања, вклучувајќи ги и оние со заостанати долгови од минатите години, велат лицата, барајќи да не бидат идентификувани бидејќи станува збор за приватни прашања.

Овој потег ја нагласува зголемената итност во владата да ги прошири своите извори на приходи бидејќи продажбата на земјиште паѓа и растот забавува. Тоа исто така се усогласува со кампањата за „заеднички просперитет“ на претседателот Шји Џјинпинг за создавање поеднаква распределба на богатството во втората по големина економија во светот.

Контактираните лица се соочуваат со давачки до 20 отсто на добивката од инвестициите, а некои се подложени и на казни за задоцнети плаќања, велат лицата, додавајќи дека конечната сума е предмет на преговори.

Даночниот притисок од Кина исто така ја следи нејзината примена на Заедничкиот стандард за известување во 2018 година, глобален систем за споделување информации чија цел е да се спречи даночно затајување. Додека локалните регулативи секогаш предвидуваа жителите да се оданочуваат на глобалниот приход, вклучувајќи ја и добивката од инвестициите, тоа ретко се спроведуваше до неодамна, велат изворите.

Не е јасно колку се цврсти намерите на властите и колку долго ќе траат, додаваат тие. Некои од засегнатите Кинези имале најмалку 10 милиони долари во офшор средства, додека други биле акционери на компании котирани во Хонгконг и во САД, според упатените.

Кинеското даночно биро не одговори на барањето за коментар.

Според ЦРС (CRS), Кина автоматски разменува информации со речиси 150 држави и територии за сметки што им припаѓаат на луѓе што подлежат на даноци во секоја земја членка во последните шест години.

„Кина веќе има ризница со податоци што даночните власти лесно може да ги искористат за да ги откријат можностите за даночење“, вели Патрик Јип, потпретседател на „Делојт Кина“ (Deloitte China). „Потенцијалот за индивидуални даночни контроли, во однос на даночните контроли на претпријатијата, би бил во пораст.

Кинеските богаташи се во центарот на вниманието откако претседателот Шји започна повеќегодишна акција во секторите на потрошувачки интернет, финансии и имот.

Кампањата ја наруши довербата на најбогатите поединци во земјата во која во 2018 година се создаваше милијардер на секои неколку дена. „Бостон консалтинг“ (Boston Consulting Group) процени дека од личното богатство на земјата во износ од 24 трилиони долари, околу 1 трилион долари се чуваат во странство. Кина исто така забележа скок на емиграцијата на богатите граѓани, при што повеќе од 1,2 милион луѓе ја напуштиле земјата од 2021 година, според податоците на Обединетите нации.

Повеќе детали прочитајте на овој ЛИНК.

Во моментов нема коментари за веста. Биди прв да коментира...

Остави коментар