Расте продажбата на возила во земјава, секторот пред нови предизвици

Сè повеќе се увезуваат нови возила во земјава, покажуваат податоците на Царинската управа на Македонија што се однесуваат на периодот од јануари до јули годинава. Во тој период во земјава влегле 5.845 нови патнички автомобили, што е најмногу во последните пет години.

Истовремено расте вкупниот увоз на возила и се враќа на нивото од претпандемиската 2019 година. До јули годинава во земјава влегле вкупно 25.172 возила, што е значително забрзување во однос на минатата година, кога во истиот период биле увезени 19.615 патнички автомобили.

И европскиот пазар заздравува по проблемите што автомобилската индустрија ги имаше од почетокот на пандемијата на ковид-19 и периодот потоа, кога се појавија прекини во синџирите за снабдување, особено со чиповите од Кина, а потоа и со високата инфлација од минатата година.

Од најголемите земји производители на автомобили во Европа, Франција прва ги објави податоците за јули што се однесуваат на нови регистрации. За првпат биле регистрирани 128.946 возила, што е раст од 19,9 отсто на годишно ниво. Растот се должи на зголемената продажба, особено кај групацијата „Рено“. Во периодот од јануари до јули компанијата продала за 30,8 отсто повеќе возила од лани. „Стелантис“ бележи пад од седум отсто до јули.

„Тојота“ стана светски производител број 1

Надминувањето на проблемите со снабдувањето со полупроводници, постепеното закрепнување на побарувачката и слабиот јен ја направија јапонската компанија за производство на автомобили „Тојота“ најголем производител во светот во првата половина од оваа година.

Компанијата објави дека во вториот квартал остварила рекордна оперативна добивка од 7,7 милијарди долари, што е далеку над проекциите за оваа година. По оваа објава, во вторникот, акциите на „Тојота“ на берзата во Токио се зголемија за 2,5 отсто и, според податоците што ги собира „Блумберг“, од 1974 година ова е рекордна вредност. Растот продолжи и вчера.

Високата продажба во првата половина од годината се должи и на рекордната продажба на возила во јуни. Заедно со подружниците на „Дајхатсу моторс“ и „Хино моторс“, „Тојота“ продаде над милион возила или 10 отсто повеќе споредено со мај.

Од „Тојота“ велат дека до овие бројки дошле и покрај растот на цените на возилата, што помогнало „да се намали влијанието од наглиот пораст на цените на материјалите“.

Bloomberg

Менаџментот очекува дека со крајот на годината продажбата на домашниот пазар ќе се зголеми за 19 отсто, а на американскиот пазар за 18 отсто. Сепак, компанијата не е задоволна од резултатите постигнати во Кина, каде што забележа пад од четири отсто

„Падот на бизнисот на ’Тојота’ во Кина е загрижувачки“, објави менаџментот. „Влијанието е врз целата индустрија, но загрижувачко е за компанија како ’Тојота’“.

Од другите јапонски автомобилски производители, резултати објави и „Хонда“, чија продажба се намали за четири отсто на годишно ниво. „Нисан мотор“ има раст од 5,7 отсто во првата половина од годината.

Недостигот од камионџии и делови за електрични возила ја расипува сликата

Сепак, бизнисот и натаму ќе се соочува со предизвици. Германскиот производител на автомобили БМВ предупредува дека трошоците за производство на делови за електричните возила ќе бидат една од причините за нарушување на готовинскиот тек во овој сектор.

Според очекувањата на компанијата, претходните проекции за готовинскиот тек во индустријата изнесуваа седум милијарди евра, сега паднаа на шест милијарди. По ова предупредување, во вторникот, акциите на производителот на луксузни автомобили паднаа на најниско ниво по мај. Падот продолжи и вчера.

Според соопштението на компанијата, „повисоките трошоци за логистика поради инфлацијата, како и проблемите во синџирот на снабдување за електричните возила, ќе продолжат и во втората половина од годината“.

Откако беше надминат долготрајниот проблем со синџирите за снабдување со полупроводници, сега неколку производители на автомобили се борат со логистички ограничувања, како и со недостиг од делови.

„Фолксваген“ минатата недела ја намали прогнозата за испораки, откако недостигот од возачи на камиони остави готови возила заглавени во фабриките. „Порше“, пак, мораше да ја ограничи продажбата на својот електричен „Тајкан“ (Taycan) откако не успеа да набави одредени компоненти.

Компанијата, истовремено, малку ја зголеми својата прогноза за заработка за цела година, бидејќи очекува нарачките да останат силни и да се подобри достапноста на нејзините премиум-возила.

 

Во моментов нема коментари за веста. Биди прв да коментира...

Остави коментар