Сончевите панели произвеле над 500 отсто повеќе струја од лани

Производството на струја од сонце во јули годинава било за 500 отсто поголемо од лани. Според податоците што денеска ги објави Државниот завод за статистика (ДЗС) за произведената електрична енергија во јули, во соларните централи биле произведени 30.552 мегават-часа електрична енергија. Во истиот месец лани производството изнесувало 4.901 мегават-час.

Висок раст од близу 74 отсто има и кај производството на струја во биогасните централи. Во јули лани биле произведени 3.214 мегават-часа, а годинава 5.590 мегават-часа електрична енергија.

Нешто над 30 отсто од вкупната произведена струја во јули е од хидроцентралите, што е раст од 6,2 отсто во однос на истиот месец минатата година.

Кај производството на струја од ветер нема значителна промена, годишниот раст изнесува 2,7 отсто.

Податоците на ДЗС покажуваат дека производство на струја во термоцентралите во јули паднало под 30 отсто, а производството во комбинираните постројки е на нивото од лани.

Во јули извозот на струја бележи раст од над 35 отсто на годишно ниво. Увозот, пак, се намалил за 8,7 отсто споредено со јули лани, но постои тенденција на раст на месечно ниво.

„Вкупната потрошувачка по видови енергенти изнесува: 446.827 мегават-часа електрична енергија, 29.721 мил. нм3 природен гас, 290.582 тони јаглен и 103.770 тони нафтени продукти. Бруто-домашното производство на електрична енергија учествува со 100 отсто во бруто-домашната потрошувачка на електрична енергија, додека 99,8 отсто од вкупната потрошувачка на јаглен се употребени за производство на електрична енергија“, соопшти Државниот завод за статистика.

Во моментов нема коментари за веста. Биди прв да коментира...

Остави коментар