Германија и Франција во битка за иднината на автоиндустријата

Групата на земји, предводена од Германија, кои поддржуваат автомобили со мотори со внатрешно согорување го заостри спорот околу европскиот закон со кој таквите мотори би заминале на депониите, како дел од историските напори за намалување на емисиите на штетни гасови од сообраќајот.

По состанокот во Стразбур, клучните министри од групата земји рекоа дека треба да се променат правилата кои предвидуваат забрана за продажба на нови автомобили и комбиња со мотори со внатрешно согорување од 2035 година, што веќе е прифатено од Европскиот парламент и е начелно договорено од земјите-членки. Како што пишува „Политико“, иднината на моторите со внатрешно согорување се претвора во француско-германска војна.

„Нема предлог од Европската комисија (ЕК) што одговара на она што ние го очекуваме и затоа сè уште не сме стигнале до целта“, изјави германскиот министер за транспорт, Фолкер Висинг, по средбата.

Париз сигнализираше дека ќе остане на планот на ЕУ за постигнување нулта емисии од новите автомобили и комбиња до 2035 година. Истото го мисли и официјален Мадрид, што значи дека овие две земји, кои се меѓу најголемите производители на автомобили во Европа, се приклучија на групата помали земји кои веќе се обврзаа да ги намалат емисиите на CO2 од патничките возила.

„Подготвени сме да се бориме за тоа, бидејќи одложувањето би било грешка во еколошка смисла, а мислам и во економска смисла“, изјави францускиот министер за економија, Бруно Ле Мер.

Во спротивниот агол е германската влада, која врши притисок заедно со сојузниците Италија, Полска, Бугарија и Чешка да искористи дупка во законот со што би се овозможило автомобилите да користат е-горива, синтетички и нешто позелена алтернатива на фосилните горива, што можат да се користат во конвенционалните мотори со внатрешно согорување.

Bloomberg

Заедно тие имаат доволно кредибилитет за да го блокираат законот, во пакет со другите идни закони за емисиите од автомобили наречени Еуро 7 односно правилата за поефикасни горива за камионите.

Не сите се грижат за е-горивата како Германците, изјави чешкиот министер за транспорт Мартин Купка, кој свика самит на сојузот за мотори во Стразбур, но списокот со барања за Комисијата ќе ги опфати сите три закони и ќе биде испратен во наредните денови.

Договорот „виси“

Германија веќе го отфрли првиот предлог на Брисел за постигнување примирје во однос на целта до 2035 година. Минатата недела, „Политико“ објави дека Комисијата е подготвена да предложи правна декларација што ќе создаде законска дупка за е-горивата со што ќе се зајакнат необврзувачките одредби на маргините на договорениот текст за стандардите за емисија на CO2 од автомобилите и комбињата од 2035 година.

Но, тоа не му се допадна на Берлин, каде што Слободната демократска партија (ФДП), која поддржува автомобили со мотори со внатрешно согорување, го контролира Министерството за транспорт.

ФДП смета дека е отворено важно политичко прашање при што можат да се слушнат стравувањата за болната промена што ќе ја следи транзицијата кон електрични возила, што ќе значи затворање на стотици компании специјализирани за делови за мотори со внатрешно согорување, за кои нема место во светот на електричните возила.

„Предлогот на Комисијата е формулиран толку претпазливо што не може многу да се направи со него“, рече Бернд Ројтер, портпарол на ФДП за транспортна политика, додавајќи: „Тоа ги одложува работите за многу далеку во иднината. Не сакаме толку слаб компромис“.

Комисијата има мал простор за маневрирање за да постигне договор, бидејќи Европскиот парламент е дециден дека нема повторно да го отвори конечниот текст договорен минатата година. А има уште многу малку време до европските избори следната година.

„Не можеме да си дозволиме да бидеме ставени под притисок на времето бидејќи не сме ние тие што го оставија ова прашање отворено со месеци“, рече Висинг, тврдејќи дека Комисијата требала да го реши проблемот минатото лето.

Беа отфрлени и предлозите за формирање работна група која ќе ги разгледа опциите за е-гориво и ќе се договори за повторно разгледување на законот во 2026 година, како што е вообичаена практика за законите на ЕУ. „Тое не е она што ни треба“, рече Висинг.

Ројтер од ФДП сака целосно посебен закон за е-горива што ќе ги надмине стандардите за ефикасност на возилата; но за да се подготви е потребно време и не постои гаранција дека Европскиот парламент и другите земји на крајот би го прифатиле.

Чешкиот министер Купка рече дека министрите кои поддржуваат мотори со внатрешно согорување се уверени дека може да се постигне договор со Комисијата во наредните денови, вклучително и правно обврзувачко изземање со други средства, а не со повторно отворање на законот.

Континентален раздор

Но, Франција не е заинтересирана за промена на мерката, за чиј договор беа потребни речиси две години тешки преговори и која беше финализирана за време на француското претседателство со Советот на ЕУ минатата година. Мерката треба да биде уште формално потврдена од министрите на земјите-членки на Советот на ЕУ за да стане закон.

Одложувањето на планот „не е економски кохерентно, тоа е индустриски опасно, не е во наш национален интерес, не е во интерес на нашите национални производители и пред сè не е во интерес на планетата“, рече Ле Мер.

Во спорот, Франција се согласува со другите земји кои ја поддржуваат целта за чисти автомобили од 2035 година, како што се Шпанија, Белгија, Шведска, Данска, Ирска и Холандија.

Bloomberg Mercury

Спорот ги поткопува напорите на Европа да биде глобален лидер во намалувањето на емисиите на стакленички гасови и ризикува да се прелее во пошироки дебати за рамнотежата на моќта во европската политика.

„За Французите оваа ситуација е исто така можност“, рече еден дипломат од земја која поддржува забрана за мотори со внатрешно согорување. „Колку повеќе можат да придонесат за идејата дека Германија е осамена, толку повеќе ќе го зајакнат ставот дека Германците се несигурен партнер во Европа“, додаде дипломатот.

Наместо заштита за застарената технологија, Ле Мер сака европските производители на автомобили брзо да преминат кон електрични возила и ги поддржува огромните државни субвенции на Франција за електрични автомобили и напорите на ЕУ да инвестира милијарди во изградба на европска индустрија за батерии.

За Ле Мер, поважно е да се забрза транзицијата кон електрични возила колку што е можно повеќе, отколку да се забави темпото на транзиција со создавање на неизвесност околу рокот до 2035 година.

„Не можеме да зборуваме дека има климатска криза, што е точно, што сите го знаеме во нашите градови, во нашите метрополи, кои сè уште се премногу загадени, а потоа да се повлечеме од целта да се префрлиме на електрични возила“, заклучи Ле Мер.

Во моментов нема коментари за веста. Биди прв да коментира...

Остави коментар