Трамп беше главна ѕвезда и оваа недела. Прво им се закани со царини на осум европски земји поради тензиите за Гренланд. Потоа отиде на собирот во Давос, каде што зборуваше подолго од еден час, кажа и зошто му е важно парчето мраз, па се откажа од царините откако беше постигнат рамковен договор за островот. Во меѓувреме Европа останува лута. Франција бара вежба на НАТО во Гренланд, властите во Гренланд го повикаа населението да се подготви за можна инвазија.
Трамп зборуваше и за неговата омилена тема „зелената измама“, како што ја нарекува зелената агенда. Ние проверивме што од тоа што го кажа е точно и се покажа дека повеќе нешта се поблиску до измама отколку до вистината. Измамени биле и некои милијардери во Давос – платиле за лажни влезници за да дојдат до американскиот претседател.
Тој го формираше и својот Одбор за мир во Газа, покани многу од светските лидери во него, но на потпишувањето не беа клучните лидери од Г7 и ЕУ.
Прочитајте повеќе:
Како Европа може да претвори американски средства во оружје за одбрана на Гренланд
Трамп ja тужи „ЏП Морган“ за пет милијарди долари поради прекин на банкарските услуги
Неделава поминува и во знакот на иницијалните јавни понуди. „Спејс екс“ одбра елитни банки за најголемото ИПО досега, а акциите на ЦСГ скокнаа за 28 отсто на дебито во Амстердам.
Анализиравме зошто силниот раст на среброто не значи дека е метал на кој треба да му се верува и зошто сопственикот на FTSE 100 размислува за олабавување на правилата за странски фирми.
Проверивме кои се компаниите од кинеската извонредна десетка што може да ѝ парираат на американската величествена седумка и кој може да ја наследи Кристин Лагард како претседател на ЕЦБ.
Во земјава, статистика објави дека просечната плата продолжува да расте, но тоа не значи ништо за стандардот и купувањето подобри автомобили. Продолжува увозот на половни возила, а електричните не се продаваат затоа што нема инфраструктура.
Со овие возила не ѝ тргна ниту на Европа, иако ретерираше од одлуката за запирање на производството на мотори со внатрешно согорување. На повидок е ново ретерирање во овој правец – ако има „пазарни нарушувања“, ќе има отстапки и од CBAM. А сето тоа во време кога најбогатите го потрошија годишниот лимит за CO2 за само десет дена.
Прочитајте повеќе:
За нашите богаташи не е сѐ само во акции, има нешто и во луксузните чанти и часовници
Дали и какви дивиденди може да се очекуваат од македонските блучипови?
Како да се „измами“ смртта за 200.000 евра?
Продолжуваат преговорите за завршување на војната во Украина. Трамп во Давос се сретна со Зеленски, кој овој пат жестоко ја искритикува ЕУ. Американската делегација отиде на средба со Путин, а потоа и на трилатерална средба во Абу Даби, но договор нема на повидок, со оглед на тоа што Донбас останува отворено прашање.
Трамп го искомплицира процесот на издавање визи, па сега американските компании применуваат нов модел. Прво ангажираат работници за работа од далечина, па најдобрите можат да дојдат во позиција да добијат и виза.
Комплицирањето на визниот режим за САД нема да важи за СП. За следење на фудбалските натпревари издавањето визи ќе забрза. Анализиравме и кои тимови ги заменија англиските премиерлигаши на листата на најбогати клубови. Проверивме и какви се фудбалските лиги во регионот – и, за жал, Македонија останува далеку од просекот.
.webp){kind=icon}
