Неделата почна турбулентно откако во текот на викендот САД ја спроведоа операцијата „Полноќен чекан“ и ги бомбардираа нуклеарните постројки во Иран. Тие за првпат користеа бомби за пробивање бункери, стелт бомбардерите полетаа од Мисури кон нивната цел, а Пентагон соопшти дека последен пат ваква акција била извршена по терористичките напади на 11 септември 2001 година. Пазарите реагираа невообичаено мирно на воената ескалација, освен во случајот со цената на нафтата. Сепак, откако Трамп прогласи прекин на огнот, и таа падна.
Неделава помина и во знакот на самитот на НАТО во Холандија. И таму Трамп беше главна ѕвезда. Главната вест е дека земјите членки се договорија да ги зголемат трошоците на пет отсто од БДП, колку што побара Трамп. Единствено Шпанија не се согласи да плаќа повеќе за својата одбрана.
Прочитајте повеќе:
Битка за податоци – регионот Адрија во потрага по сопствена вештачка интелигенција
ББА-анализа: Македонија ја почна годината со највисок раст во регионот Адрија
Околу цената на нафтата се вртат и локалните вести. Трендот што почна минатата недела продолжи во понеделникот, кога РКЕ уште еднаш ги зголеми цените на дериватите. За намалување се чекаше до вчера, а експертите уште еднаш изразија загриженост дека енергетската зависност е главен проблем за инфлацијата во земјава.
Новиот гувернер оствари средба со банкарите и достави, така да речеме, непристоен предлог до нив – да ги намалат или укинат провизиите што ги наплаќаат од граѓаните и од фирмите. Банкарите, по средбата, соопштија дека ова прашање го решава секоја банка поединечно и дека транспарентноста на банкарскиот сектор во земјава е на највисоко ниво.
Пишувавме и за проклетството на третата генерација во семејните бизниси. Истражувањата покажуваат дека до трето колено преживуваат само 12 отсто од семејните компании. Анализиравме и каква е иднината на ЕСГ и какви придобивки можат да донесат овие стандарди во земјите од регионот.
Неделава заврши судењето за убиствата на Вања и Панче. Четворицата обвинети добија доживотната казна затвор, а таткото на убиеното девојче беше ослободен од обвинението.
Прочитајте повеќе:
Од небо до врв: Македонија станува рај за алтернативен туризам
Задржете го здивот, отворете го умот - зошто сè повеќе бизнисмени сакаат слободно нуркање
Акциите на компанијата „Енвидија“ (Nvidia) неделава достигнаа рекордна вредност, со што лидерот во чипови за вештачка интелигенција дополнително ја зацврсти својата позиција како една од највредните компании во светот.
Доларот слабее по веста дека Трамп ќе го смени првиот човек на Фед пред истекот на мандатот, а станува сѐ поизвесно и дека барем до есен американската централна банка нема да ги намали каматите. И цената на златото се намалува по прекинот на огнот на Блискиот Исток, затоа што инвеститорите веќе не бараат сигурни засолништа.
Пишувавме и за спортот. Останува помалку од една година до почетокот на следното Светско првенство, најголемиот фудбалски турнир во светот. За сите оние што сакаат да се снабдат со билети, напишавме вистински мал водич. Новиот договор на Лука Дончиќ е една од најголемите теми во спортскиот бизнис летово. Како навистина ќе изгледа танцот на стотиците милиони, ќе се реши во наредните денови.
.webp){kind=icon}
Во моментов нема коментари за веста. Биди прв да коментира...