Европските дипломати му испратиле сериозни предупредувања на Кремљ истакнувајќи дека НАТО е подготвен одлучно да одговори на секое нарушување на воздушниот простор, вклучувајќи и соборување руски авиони. Ситуацијата ескалира откако неделава во неколку наврати беа затворани аеродроми во Данска поради дронови, а властите спроведуваа истрага за да откријат дали и зад овие летови стои Русија. Претходно и Трамп повика сојузниците на НАТО поагресивно да одговорат на зачестените нарушувања на воздушниот простор од страна на Русија.
Како дел од притисокот за крај на војната во Украина, Трамп бара од НАТО-земјите да не купуваат руска нафта. Орбан не попушта пред барањето на Трамп, а цената на нафтата неделава растеше.
Американскиот претседател Трамп имаше бурна недела. Откако мораше пешки да се качува по ескалаторот во зградата на Обединетите нации, затоа што тој престана да работи, им одржа лекција на другите светски лидери и ја нападна организацијата што не му помогнала додека завршувал седум војни во светот.
Трамп неделава најави и 100 отсто царини за фармацевтските компании што немаат производство во САД, а пред тоа го поврза парацетамолот со аутизмот, што предизвика лавина реакции кај стручната јавност во светот.
Прочитајте повеќе:
Скапата виза Х-1Б на Трамп ја скрши надежта за многу идни работници во САД
Дискриминирани приходи – да се има сè е само сон
Царините на Трамп ќе ја обликуваат и идната година. Според најновиот извештај на ОЕЦД, за тогаш се очекува ударот од највисоките давачки што САД ги воведоа по 1933 година. Ефектот од нив го очекува и најголемата европска економија, Германија, каде што засега со оптимизам се гледа на владините мерки што треба да го забрзаат економскиот раст.
Ако тие мерки дадат резултати и се зголеми потрошувачката во Германија, работа ќе има и за македонските автомобилски компании. Но оптимизмот не е преголем, а вестите за отпуштања и прекин на производство во нашиот најголем трговски партнер стигнуваат секојдневно. Такви вести стигнуваат и од текстилниот сектор во земјава.
За Македонија, нашите аналитичари прогнозираат дека растот следната година ќе зависи од извозот и приватната потрошувачка, а ќе изнесува околу три отсто, но инфлацијата ќе остане леплива и ќе изнесува 4 отсто.
Еден вид мотор на економијата во Македонија се очекува да биде и берзата, па затоа, според зборовите на министерката за финансии, Министерството вложува напори да создаде услови за пазарот на капитал да работи посилно и постабилно. Таа зборуваше на годишната конференција на Македонската берза. На настанот се обрати и првиот човек на НЛБ Љубљана, Блаж Бродњак, според кого ЕУ ќе направи геостратешка грешка ако не ги прифати земјите од Западен Балкан.
А кога станува збор за Македонската берза, еден од нејзините скриени дијаманти е „Прилепската пиварница“. Нашите аналитичари ни објаснија зошто, а ги анализиравме и добивките на македонските телевизии и радија.
Прочитајте повеќе:
ЕУ почнува со инстант банкарските плаќања, во Македонија ќе почекаме уште една година
Колку се збогатија Македонците што инвестираа во злато?
Регионот се врти и кон нуклеарната енергија за да ги задоволи потребите за струја, а истовремено и да ги исполни климатските цели. За нас, засега, нуклеарките не се опција и затоа што се скапи, но и поради отпадот што го создаваат, а земјава не може да се справи ни со помалку опасниот отпад.
Вештачката интелигенција и неделава беше во фокусот, инвестицијата од над 50 милијарди долари во ВИ ја направи акцијата на кинеската „Алибаба“ најпопуларна кинеска технолошка акција. „Енвидија“ и „Опен еј-ај“ најавија договор од 100 милијарди долари за изградба на дата-центри за ВИ, а „Интел“ ќе се обиде да воскресне со помош на „Епл“.
Еуфоријата за вештачката интелигенција е евидентна, но што ако пукне меурот е прашањето со кое се занимаваме неделава.
Како бомба пукна и веста за суспензијата на Џими Кимел од американската телевизија Еј-би-си, но тој се врати на екраните со длабоко извинување, што повторно не беше доволно за Трамп.
.webp){kind=icon}
Во моментов нема коментари за веста. Биди прв да коментира...